يحق لك

يابنت ياللي في عذابي تمادين
ماهو بحق (ن) جعل روحي فداك
 
سهرت انا (وانت قريره تنامين)
تعبت انا (وانت بقمة رضاك)
 
كم انتظرت وكان قصدي تجيبين
على خفوق(ن) من اعماقه دعاك
 
(لاتجرحينه) ثم عنه تصدين
خلّي قليل من الام ل في رجاك
 
بعينك اسهوم وياسلاح(ن) بحدين
طواع لك وملبيات نداك
 
بين الجوانح قلب لو به تشوفين
تمثال ود ورمز مثّل هواك
 
على الامل مايبتغي منك تامين
لو غالط الواقع بقوله (معاك)
 
ماهي من امس ومعرفتنا لها اسنين
مع كل يوم يزيد عندي غلاك
 
مانت جديد بعالمي حيث تدرين
بخاطري شخصك كانه ملاك
 
قل السلام..وقول اهل(ن) وسهلين
ترحيبة احجاجك قبل نطق فاك
 
يحق لك بين الخلايق تباهين
الله عطاك الزين وزاد بحلاك
 
وبحق لك في كل شيء تقولين
ويحق لك تبدين مافي خفاك
 
ويحق لك فوق التدلع تغلين
(ويحق لك مالا يحق لسواك)
 
ملحه وخفة دم غطت على الزين
ماتختفي ومبينه في لماك
 
ياليت(انا) من هو لقربه تمنين
وياليت (انا) من كان هو مبتغاك
 
عواد الهران