ذكّرتني

يا اللي دعيت الطير في راس مرقاب
حايم وحوّل يوم شافك دعيته

مبطي مصدّ وناسين جرح الاحباب
لين انفتق جرحي بجرحٍ شكيته

ذكرتني يالقرم في غايبٍ غاب
ابعد نصيبه واقتنعت ونسيته

صديت عنْه وخاطري منْه ما طاب
قلبي منعته عن هواه ونهيته

لوهو عزيز وغير عن كل الاصحاب
اللي جزاني بالمحبه جزيته

عندي لصدّه صدّ وغيابه غياب
ان عاف عفته وان بغاني بغيته

خلك عزيز النفس خل عندك اداب
مع الوليف اللي هواك وهويته

واقرب قريبٍ ما عطى قربك حساب
بعيد بعد الحي عن شوف ميته

القرب ماهو شرط في قرب الانساب
القرب من يا احتجت قربه لقيته

كم واحدٍ لو هو من الناس الاجناب
يا ضقت من دون القرايب نصيته

يقطع على شانك مشاوير واتعاب
ياصلك يا ابطى عنْك لو ما دعيته

و احدٍ من الجيران والباب بالباب
ما جاك لو بيتك مقاصر بيته

لا تِلحق المقفي مشاريه وعتاب
يجفاك بعض الخلق لو ما جفيته

و صدٍّ يجي من دون تقصير واسباب
ما هو بصدّ اللي بغاك وبغيته