ايام السعد

عيوني الثنتين من كثر البكاء تخشاء الرمد
ابكي علي اللي من بعدهم حالتي عزالها

راحوا طحاطيح الرجال اللي لنا كانوا مدد
اهل الوجيه اللي سعدها دايمٍ في فالها

شيبان قريتنا هل الناموس وافين العهد
يابري حالي لاذكرت اخلاقها وافعالها

ابكي على وقت مضى لو كانت ايامه نكد
لكن حلاوة وقتها في لونها واشكالها

واسرد خيالات الفكر في حلم ليلٍ من مسد
واقول ياليت الليالي ماتغّير حالها

وذكرت مايدمي جروحٍ ما يفيد بها الضمد
في مدة راحت وغاب من العيون هلالها

واسمع سوالفهم عن اللي قبلهم واللي بعد
عن الثلاثة والقصور اللي يظل إظلالها

ثلاثة آل هويج قبل الارض يملاها العدد
حتى القبايل غيرنا في حالةٍ يرثالها

وقمت أتذكر رفقة الشيبان وأيام السعد
يوم الموده طيرها من بينهم غنا لها

واذكر مثل كانوا يقولونه ورد هادي ورد
وآثار هادي من دواهي لابتي وأبطالها

واذكر نصائح والدي لي لازهمني ياولد
نصائح تسوى الذهب وجنيهها وريالها

يقول لي من قبل يإذن شد حيلك واستعد
ترا صلاتك خير من دنيا الشقاء و اموالها

وعليك برضاء والدينك خاب من عق وحجد
اهل الرضاء ماحصلت غير الرضاء في جالها

واسمح لبن عمك على العوجاء وخلك له سند
حتى لّو ان زلاته اكبر من قناء وجبالها

ترا المسامح فاز بالدنيا وفي يوم الوعد
ولا يهمك كلمةٍ راعي النمايم قالها

الكلمة اللي مالها حجة ولا حي شهد
لابد ماترجع على اللي في المجالس شالها

وإن جاك ضيفٍك فاعطه الماجوب وأعطه ماوجد
والحاجة الى ماوراه خير لا تسعالها

ولا تماشي لك ذليل كل ما قام ارتعد
كمٍ من ذليللٍ ميّلت به غترته وعقالها

ولا تساير لك بخيل من عشاء ضيفه شرد
اللي مصاريفه هدايا حرمته وعيالها

ولا تمد أيدك على زادٍ من البارح برد
ولا تقهوى الدله اللي بارد فنجالها

ون جيت ضيف اقلط مع الاول ولا تضحك لحد
حتى تعرف الوضع والجلسة وشرحت بالها

وصّا وصايا جعله الجنة مقر للابد
آامين جعله في جنان عاليٍ منزالها

واليوم اشوف الفرق واضح والزمن قام وقعد
ولفّت بنا الدنيا ودارت مكرها وحبالها

صارت يمين الادمي يومي بها قِل الجهد
تشمت عليها كل ما جار الزمان إشمالها

والنوه اللي مالها بارق ولا فيها رعد
عزي لقاعٍ تنتظر منها مزون خيالها

والخيمة اللي مالها كربه ولا فيها عمد
اخير منها غصن عود الحنظله وظلالها

يالله ياللي مالنا غيرك ملاذ ولا وسند
سترك وعفوك ياعليمٍ بالبشر وآجآلها

ادعيك دعوة مسلم لرضاك ولوجهك سجد
في يوم ماينفع عبادك غير حصد اعمالها

ماينفع المنصب ولاينفعك لو تحكم بلد
في ساعة ما تنفع اهل المال كثرت مالها

مالي سواء رحمتك والغفران يافردٍ صمد
الناس بعد الموت يارحمن ويش يبقالها

https://www.youtube.com/watch?v