يا شوق حلويـنٍ

يا شوق حلوينٍ أو زينات
شهمٍ ولك ميزه نجيّه

لا تسيّع الونّه ابعبرات
أو لا تكون في فكره قويّه

يا بو جسيم الوقت ما فات
بنسير بك سيره هنيّه

غيّه وفيها من الشّراغات
اطيور سرعاتٍ وحيّه

متعلّمات الصّيد في اوقات
ومدرّباتٍ بالسّويّه

ماشي شرد عنهن ولا فات
صقّارهن نفسه رهيّه

ما يتمّ يعزا كلّ ثبّات
لي يلّعت له لوّليّه

في الطّرد ما يعطي مسافات
يلحق اوله ضربه قويّه

لي في الخلا راعيه ما بات
ولا صوّع الرّبع او خويّه

لي له مع طرده مصابات
يشلع ثنادوها طريّه

ياما نزل من الدّم قطرات
من ضرب كفّه في اضحويّه

واربوعنا امثالهم اميات
شبّان وانفسهم زكيّه

لي للخوي معهم مزيّات
حشمه ومدراة او حميّه