خنجر الفقد (مرثية)

لا تشتكي لي قل وصل الحبايب
وانا بخنجر فقد الاحباب مطعون

مصايبك ما هي بعيني مصايب
شكواك للي في هوى البيض مفتون

يا شَيَن ما عزّوك باغلى القرايب
بيّحت حزنٍ داخل القلب مكنون

حزني على اللي بين عوج النصايب
صام رمضان ورابع العيد مدفون

دفنت شيباني عجوزٍ و شايب
ومعهم دفنت أغلى المخاليق بالكون

طفلٍ حياتي بعد ما صار غايب
غير السواد اليوم ما ساد به لون

قلبي على شوفه من الولف ذايب
من موت سيف بسجن الاحزان مسجون

لو الرجا في ميت العام خايب
قلبي مع اللي فارق القلب مرهون

اطلب عسى رحمة مدير الهبايب
تضمن لهم فوزٍ عن النار مضمون