سلني يابو علي فالجوف ملة
حسها بالقلب تولع به سعير
رد لي بالصوت صوتك مانمله
الهواجيس أقبلت يمي تسير
نعلبوه الفقر كم من جيد ذله
في زمن ماعبر الرجل الفقير
يسهر ودمعه على خده يهله
وحبله لما يطلبه دايم قصير
ولو مكانه فاللوازم ماوصله
راعي الكشخات والمال الوفير
كم فقير يشل حملن مايشله
صاحب الاموال لو شفته امير.
ياحبيبي لو تطالع فالمجلة
تعرف العنوان بالخط الكبير
لو عطوك المال عمري لك بكله
راس مالي صار في يدك اسير
ﻻ تخون الود قلبي مايحله
غيرك ابن ادم وﻻ يمكن يصير
ان يفرط خل في عشقه لخله
دام حبه في حياته له مصير
ارتقي بك للنجوم اللي مطلة
في حسابي انت الاول والاخير
الظروف تحدني واللغز حله
في يدك والصبر يجلب كل خير
ضايقن حالي مثل خرم المسلة
من فراقك كنني في قعر بير
ياعسى الورد الندي يجمع بظله
بعد غيبة بيننا انشم العبير
وياعسى قلبن عطش وصلك يبله
و ياعساك تعيش يالغالي بخير

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين