انا بنت الشعر

أنا اسمي مثل وسمي يشرف من يعرفونه
ولو حرفي دنا له يوم يحطم شامخ حروفه

انا محد(ن) يشابهني ومن شبهني يرثونه
انا مشبه (فلانه) لا.. وتشبيهي بها حسوفه

سلامة (وزن) مع قوة (بألفاظه) ومكنونه
امثل في (الشعر) وارسم خيال (ن) شدني شوفه

رسمت الحرف بأشكاله عشقني وصرت مفتونه
قصيدي لو قريته يوم تحس انك من ضيوفه

انا بنت الشعر واخته وامه وفيه مجنونه
عشقت الحرف يوم انه عشقني كامل وصوفه

يجيني القاف من بدري واهلي به على لونه
اصيغه كيف ما اصيغه اباري حرفه واحوفه

سقيت الشعر باحساسي وهلت صافي مزونه
غدى شعري مثل مزن(ن) يعم الخير ملهوفه

يصيب ارض الشعر بالخير ومنها تورق غصونه
اخط اللفظ في جوفه معاني ترسم طيوفه

يداعبني وهو مني وانا منه ولا اخونه
احب الشعر يوم انه غدى باحساسي معزوفه

انا للشعر موروثه وانا بالشعر مسكونه
ابكتبني وقف للشعر وانا للشعر موقوفه

اعرف اهجي واعرف ارثي واقول الشعر بفنونه
اغني كل طاروق (ن) وكفي دوم بكفوفه

حروفي يا بعد ناسي عن الزلات مصيونه
احس بفخر لاصار الشعر مني وانا جوفه

اقوله من صغر سني بيوت الشعر موزونه
لأنه ساري بدمي .. احبه وفيه مشغوفه