الفقر حطاب

(الفقر حطَّاب)
............................

اليوم مثْل الأمْس لا طعْم لا لون
تجري بيِ الايام لا علْم وحْساب

ياللي هديتي الصدْر عصفور مسجون
يبكي سما الاحلام ما عنده احْباب

مريت ذكرى شرفتك عطْر ودْخون
وكلَّ السنين الماضيه تنزف غْياب

ضجَّة طفولة شاعرك صارتَ سْكون
وعلبة تلاوينه بقت دون أصْحاب

ان مرَّ ذكرى قال يا حظَّ ملْعون
نكبر نصير بْوحشة الدرْب أغراب

ليته يمرًّ العيد يهْدي لنا عْيون
ونْشوف شمس العيد تشرق منِ الباب

ياكثْر ما قلْت التعَب باكر يْهون
ويزهر منِ الاحجار شيحٍ وعنَّاب

حبيبتي : ليت الفقَرْ يهجر الكون
ونْعيش ما نشعرْ عنَ الناس أجناب

انا وليد الجوع بالخوف مسكون
من قال هذا الجوع ما عندهَ انساب

ما كان ميلادي على راحةَ جْفون
اذكر صحيت وْكسوة الفقْر جلباب

آقول طيَّب ما معى همَّ ودْيون
أضحك وانا كذاب مليون كذاب

كلْ ما نبت للحلْم أوراق وغْصون
من قبْل تثْمر يصبح الفقْر حطَّاب

عشَّمتني ياكثْر ما خابتَ ظْنون
ملَّيت امرر كلَّ خيبة بلاَ اسْباب

آنا احسَّ بْكلَّ جايع ومحْزون
اعرف بإنَّ الجوع وحْشٍ لهَ انْياب

الفقْر مثْل الأمْس لا طعْم لا لون
نفطر معه ويْنام معنا بلا حْساب!