مد كيله وصاعه

يا كبر همي لا كبرت وتعليت
ويا صغر همي لا ملكت القناعه

أزريت أميز هل أنا حي أو ميت
لا زاد همي وسط صدري وجاعه

يا كم تحديت الهموم وتحديت
مير الزمن غالبك غصب و طواعه

وقت السعد شفني لوصلك تحريت
ابغى وصالك لو يجي بالشفاعه

يا السعد جافيني سنينً ولا جيت
تركتنا للهم في كل ساعه

ثالث سنه وأطرد سرابك من أقفيت
حتى ملكت من السعاده مناعه

أخطيت يوم أني لوصلك تحريت
مثل العمر لا فات واقفى شراعه

يا هم لا من قلت يكفي تواليت
ولا جدت من جودك على غير طاعه

والحظ لابن ادم على كف عفريت
لا اتبعثر احظوظه ي صعب اجتماعه

ولا فقت من صمتك ترديت رديت
من يطلب الغنوة بدار المجاعه ؟

يا خاطري من مر الأيام لي بيت
من وقت خلّى الشامخ بوسط قاعه

هذا الزمن مال النكد فيه توقيت
كلً خذا من مد كيله وصاعه

وانا اشهد اني من عذابه ترديت
شايب وباقي العمر حرّج وباعه