الصورة اللي شفتها قبل ساعه

‏الصوره اللي شفتها قبل ساعه
صورة عزيزٍ مانسيته ولا يوم

من غيبته عنا ولحظة وداعه
ماعاد شفته عقبها غير بالنوم

حرٍ جمع بين الوفا والشجاعه
شيخٍ مقدّر عند ربعه ومحشوم

وافي بمداته وشبره وباعه
مايلحقه قاصر ولايلحقه لوم

زايد على غيره بمده وصاعه
ياقف مع المحتاج ويدل منجوم

ماهو كلام مروّجين الاشاعه
اللي يخالط مدحهم حبة خشوم

مدحٍ بلا برهان سب وشناعه
لايرضي العاقل ولايزعل رخوم

واللي بمعروفه طويله ذراعه
سد اللزوم وصرت بالحق ملزوم

لازالت سموعي تعيد استماعه
صوتٍ يجي ويروح ماينقطع دوم

يامر علي واقول سمعاً وطاعه
من لايطيع ابوه ماهو بمرحوم

حتى القمر عقبك تغيّر شعاعه
يابوي والانسان معطى ومحروم

أنا بفضل الله عندي قناعه
ان المصايب للبشر شي محتوم

لكن شعوري ماملكت اندفاعه
للصوره اللي جددت جرح مكتوم

والصبر لو عندي عليه استطاعه
لابد يلقى الادمي حزن وهموم

عن لوعة الدنيا ماعندي مناعه
الا بقدرة فارض الحج والصوم

اللي جعل بالكون قمه وقاعه
وارض وسما وجبال وابراج ونجوم

رب الكواكب والفضا واتّساعه
مكوّن الكاين بعد كان معدوم

مابينه وبين الخلايق شفاعه
تصعدله الدعوه بلا شرط ورسوم

يارازق الانسان وقت المجاعه
يوم انها بمناطح القوم للقوم

ياواحدٍ عرشك عظيم ارتفاعه
ياناصر محمد على الفرس والروم

ياجاعل الاجناب ربع وجماعه
بالكلمه اللي لمّت اديان وسلوم

يافازع ليوسف ومنهي نزاعه
من بعد ماهو داخل السجن مظلوم

افزع لعبدك يوم طال انقطاعه
واجعل على قبره من الرحمه غيوم

جازه بغفرانك وبدّل متاعه
في جنة الفردوس ياحي قيّوم