فكر دايمًا

فَكّر دايمًا
بقلم
آمال محمود كحيل
 
فكَّر دايمًا
إن الدنيا ما هيَّاش دايمة
إنها دنيا غرورة و فانية
والأعوام بتعدِّي وتمشي
زي الحلم فْ لحظة وثانية
جايز أحداثها تخلِّيك
تنسى وتغفل عن حقيقتها
ولَّا طموحك يوم يِغريك
فتتوه أو تاخدك سكتها
أو تغرق في بحور أوهامك
فجأة تلاقي الموت قدَّامك
خد منك أجمل أحلامك
أيام تمضي وقطر يفوت
واما يْحين أجَلك وتموت
واما يحطوك جوَّه تابوت
مش هاتحس بمين حواليك
مين هايكون
حاضر ويَّاك ؟
مين راح يشهد
على نواياك ؟
ربَّك عالِم إيه جوَّاك
كنت شيطان أو كنت ملاك
فكَّر إيه خلفت وراك ؟!
أهل وناس كانوا يحبوك ؟
طيِّب بكرة قوام ينسوك
ممكن يبكوا عليك أيام
ولا دقايق ولا ساعات
ولا تصير ف عنيهم بس
ذكرى عزيزة لإنسان مات
كل ربيع بيعدِّي أكيد
جاي بعده خريف
يحصد أغلى سنين العمر
وتصبح طيف
دنيا غرورة بتلعب بيك
لا ف يوم كانت ملك ايديك
ولا يوم عمرها هاتدوم ليك
إوعى ف لحظة غفلة تفكَّر
إنك فعلاً راح يوم تقدر
تهرب من شيء ليك متقدَّر
أجلك ؟؟؟
متحدِّد بالثانية
عملك ؟!!
شوف فين هايوديك
إوعى تغمض لحظة عنيك
إوعى آمالك تغدر بيك
فكر لحظة روحك تصعد
عند بَاريك
واما ملايكة الموت هاتجيلك
مين ممكن منها ينجيك ؟؟!
أهي لحظات صدَّقني وفكر
لما تشوف بِعينيك وتقدَّر
ازاي ممكن تبقى مجرَّد
حلم قوام في الكون يتبخَّر
ملك الموت مستني أوانك
مش هايقدِّم ، ولا هايأخر
فاعمِل طيِّب قبل مماتك
وازرع خير ليه تزرع شر
فوق من وهمك
واصحى وشَمَّر
صلي لربك وادعي استغفر
أصل الدنيا
دي زايلة يا صاحبي
والكون كله سراب
موش أكتر