رثاء ( عبيدالله عبيد )

يابو فيصل يا عبيدالله عبيد
جعل مسكانك بجنات النعيم

ما نسيتك في صيام ولا فعيد
أدعو الرحمن يرحمك الرحيم

ما نسيتك لو نسى عبيدٍ وزيد
كيف أبنسى وانت لي صاحب حميم

ليت ما بيني وما بينك بريد
وأسألك بالسين وتجاوب بجيم

واثق إن الصدق عنّه ما تحيد
هذا عهدي فيك من عهدٍ قديم

وأسألك إن كان يكفي أو أزيد
الدعاء اللي دعيته في الصميم

وإن طلبت أكثر ورغبتك المزيد
حالف إني لأجتهد والله عليم

ولو بكايه يا عبيدالله يفيد
والله لأبكي مثل ما يبكي يتيم

صرت بعدك كني بالدنيا وحيد
لا صحيب ولا صديق ولا نديم

لكن الله قد حكم باللي يريد
ولا يعارض حكم ربي إلا غشيم

نحتسبك إن شاء ربي إنك شهيد
وعد صدق لكل مبطونٍ سقيم

وإن تقدم موعدك محنا بعيد
حنا بعدك كلنا رجال وحريم

نسأل الرحمن يلطف بالعبيد
وبالخصوص اللي على النهج السليم

موحدين الواحد الفرد المجيد
طالبين العفو من ربٍ كريم