وسط الحنايا

بالحرام إنه سكن وسط الحنايا
مير كيف الحال يالقلب المصدّي

اعتزل شيطان ملعون الثوايا
واعزف إيقاعه على لحن التردّي

يا شحوح الحظ يا وفرة خطايا
بلغوه اني معه خضت التحدّي

ألتزم بالصمت عن بوح الخفايا
واعترف إني معه ماني مقدّي

غير أحاول اتجمّل في العطايا
واجبر اهمومه مع همومي تهدّي

لو يطول الوقت واسرح بالسجايا
اتحرّج من وفا طبع التعدّي

كل ما ضاقت تفرّد بالمزايا
وارسل عروضه ولو ما كان ودّي

كنت أدور فرحتي بين الثنايا
وان رسمت الحال ذكرني بحدّي

كنت بركانه وهو بعض الشظايا
ثورتي منّه وثواراته تصدّي

للحياة اللي كستنا بالبلايا
واربكت ما كان من مكنون سدّي

لكن الدنيا تقدمنا هدايا
يوم جتنا والأمل ضدّه و ضدّي

يوم سالت دمعته بين الرعايا
واستغاثة دمعتي صدقي وجدّي

مرحباً يا قبلة النفس و منايا
لو اذل الحرف له ما اوفاه ردّي

غير اسلوبي وصحح لي قضايا
بالحرام انه وفي قلبي مقدّي