ورث قاسم ( تميم بن حمد)

شيخ ياللي على العليا منازيله
مثل نجم الثريا ماقعه راسي

أصبر من الجمل لو دبّلو شيله
يلطم الكود متركد ومتواسي

نادرٍ والزمن يبطي على حيله
عاش طود حكم للحرب وسياسي

قيل من هو ؟ وقلنا نافلٍ جيله
طير غيمار فارق كل الاجناسي

ذا تميم آل ثاني لاطم العيله
عادل الميل غصب مليّن القاسي

ذا فرات المكارم دجلته نيله
وافي الشبر شبره ماله قياسي

من صغر سن يوم يبان تشكيله
مختلف عن جميع الخلق والناسي

يوم بزران خلق الله على التيله
يلعب المرجله ويعسف الافراسي

وان عطا ما يجارونه بتمويله
مدته بنك تجهل معنى الافلاسي

وان فزع فزعة القعقاع مع خيله
عن مية الف فزعه يابعد راسي

ورث عوق الخصيم مرجح الكيله
قاسم العود كاسب كل نوماسي

ساسه وهيب حنظلةٍ مواصيله
في تميم بن مرٍ صار نبراسي

لابةٍ عاد بقعا في خلاخيله
مشبعين الحدب لبّاسة الطاسي

وان نشدتوا سبب مدحي وتأويله
شاش راسي لا قيل ان ساسهم ساسي