برقع القلب - عيد الغيثي

القلب مثل الطير لازم يبرقع
يكفخ على شيلة سبوقه وشوفه

وقلبي بعض لحيان غصب يتفرقع
وضلوع صدري تمسكه وسط جوفه

يابو ابتهال القلب لصيد فرقع
صيد الضبا ياخوي جاب الكسوفه

نطرد وراه وحضنا لها مسرقع
بالليل نمشي وبالضحى في كهوفه

عين اشقرٍ ينظر عقب شيل برقع
وهدب رموش العين جيش بصفوفه

والعود عود الموز غصبٍ تصرقع
والجسم زبده بين هزة ردوفه

مبس عسل ياحظ من به يطرقع
سبحان ربٍ حسنه في وصوفه

والخد برقٍ بالمزن فوق فرقع
وليا امطرت غصبٍ تسيل شعوفه

تفاحةٍ رمان مشمش تطرقع
توت العنب تينن عسلها يلوفه

كيكة حلا قشطه ودايم تبرقع
تخاف من شوفة حسودٍ يشوفه

دلع تغنوجها جهلها تخرقع
ولنهودها تغار لمست كفوفه

وبسمت ثناياها به الموت يرقع
ان قلت ملح وسكره مع بروفه

حاست حلا مع ملح والحظ درقع
ومن الثقه دمه خفيف وعفوفه

الزين زين من الله وغصبٍ يلقع
والشين ماله قبله ولاعطوفه

يابو ابتهال الحب خاين مقرقع
تعيش حي وميت صعبه ضروفه

شعر⚡عيد الغيثي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر