ياجار كانك طعتني برقع الطير - هادي الرزقي

ياجار كانك طعتني برقع الطير
طيرك وحش واقلوبنا مستميته

لولاي رجلٍ من رجال بهم خير
ماصد واغض النظر من بخيته

ياجار طيرك كل ماعرّض اعصير
مدري علامه يلتفت مادعيته

يمر كنّه شارد الصيد لاذير
لابوه لابو حي حيّه، وميته

اغير,وانذر، وانذر القوم، واغير
وابيع روحي، وانهزم لابغيته

يردّني ياجار طبعٍ لنا غير
الجار ماندرج لغرات بيته

يبقا على حشمه، وشيمه، وتقدير
ويروح عنّي بالردا ماقفيته

من خوف شيِ مابعد صار،ويصير
يامّا هدمت البيت ،والاّ بنيته

بعدٍ عن الهيّن معزّه وتوقير
ورجمٍ على غير النقا مابديته

يحدني يم الخطا دون تبرير
اللي بلاني بالهوى ،مابليته

وانا بشر مني خطايا وتقصير
الله يغفر كل ذنبٍ جنيته!!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر