قنوات يوم وليل ماتفصل الموجات - دحيم بن رشيد الغنامي

سقى الله زمان الشعر فوق النضا العجلات
يغنونه الركبان والجيش له شله

انا اعرف اسلوب الشعر واختار منه ابيات
ليا اوحاه راع الفن والذوق مامله

وانا امتاز في شعري ونظمي والي وقفات
اركزعلى معناه واختارمن جله

يجيني بلا موعد ويفرض علي اوقات
ظروف الزمان اللي تجيبه وتدله

نصيبي مع الشعار سبعين فالاصوات
انافس لرقم اثنين والثالث احتله

وانا عايش ٍ في نجد واخذ معه جولات
حصيلي من الدنيا مصيريٍ مودى ٍ له

وانا فالصحاري عشت وارقد خلا وابات
زمانن مخيف الذيب كلش طعامن له

علي السباع الجايعه ترفع الاصوات
معي بندقي بلجيك والرمي صاح ٍ له

ادوس الافاعي حافي الرجل فالغابات
حياتي كبد وجهاد ياصبرما ندله

تجارب حياتي علمتني زمانن فات
وانا عايش ٍ قبل الخميني وابن بله

ظهور المشاكل بين الايام والساعات
معاص ٍ كثيره واخلفتنا عن المله

شباب لعب فالشعر من كثر ود وهات
معانيه خربت صاحي القلب دار ٍ له

قنوات يوم وليل ماتفصل الموجات
عربسات يرصد والمحطات ترسله

قصيد ٍ غزاه الجيل فاربع من الجهات
يبا منفذ يعطيه وانشبته الشله

يحور ويدور مع المنابر وفالساحات
ضعاف العقول اللي مريضه تطبل له

عليه العياصيف القويه تجي دفعات
جنوبية ٍ غربية ٍ شالته كله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر