رثاء ومبايعة

ودعتك الله يا حبيب المساكين
يا اللي وداعه للعرب به خساره

ودعت امي مع ابوي برياحين
واليوم اودع من غدى القلب داره

حبه سرى في الاورده والشرايين
واستوطن عروق الفؤاد بمهاره

الحاكم اللي جالس(ن)بين ضلعين
اقفا وشب الحزن في القلب ناره

يا عين ابكي وانثري الدمع يا عين
ابكي على اللي راح ابكي بغزاره

هذا ابو متعب حبيب الملايين
اللي فراقه حط بالقلب شاره

عبدالله اللي في قلوب المحبين
يبكيه في موته عدوه وجاره

الوالد اللي من رحيله حزينين
جعله في جنة خلد يقطف ثماره

وياجعل قبره روضة(ن) بالرياضين
اللي الرضا والخير دايم شعاره

ويشفع له محمد امام المصلين
اللي رفع شعبه وزاده حضاره

يا رب تغفر له وتجزاه بالزين
عد الحجر ويا الشجر في قفاره

وعداد طير ونهر وزهر وبساتين
وعداد ما يسري بليل ونهاره

وعداد ما رش المطر واثمر التين
وعداد ما لج وسكن في بحاره

لو مات عبدالله خلافه سلاطين
اخوانه اللي صيتهم في مداره

سلمان ضرغام (ن) يجوب الميادين
ومقرن ولي العهد في الحرب غاره

ومحمد النايف سعوط الشياطين
مرحوم يا اللي خصنا باختياره

جينا نبايعكم على الحق والدين
نحط يدنا في يديكم جهاره

يا خادم البيتين حنا لك نعين
حنا لك زنادك من اول اشاره

سلمان صيتك راجح(ن) بالموازين
من لا يعرفك جبتها باختصاره

مولود به عزه شديد(ن) على لين
نخله على اليمنى وسيف(ن)يساره

حكامنا منا وحنا مطيعين
نحبهم حب المفارق دياره

يالله تكفينا عذول وحسودين
وتحفظ بلدنا من المدن لصحاره

وتحفظ لنا سلمان وتبطي به سنين
اللي مشى في درب ابوه ومساره

3 – 4 – 1436 ه