اختيار الصديق

لـ علي باعوضة، ، في غير مُحدد، آخر تحديث

اختيار الصديق - علي باعوضة

مافيه اقسى من صديق وقت المهمة يخذلك
ولا فيه اصعب من خيانة تأتي امن اقرب صديق

اكبر خطية لك تحب انسان مايستاهلك
وتحاول انك تنقذه من لجة البحر العميق

وهو يريد ان يقذفك في بحر حوته ياكلك
وده تكون ابغبته من تحت امواجه غريق

هذه تجارب شفتها من سار فيها قد هلك
ولا يحصل منها المخلص سوى هماْ وضيق

وانا هنا باحذرك ياصاحبي والامر لك
وانته حكم عمرك وعارف صحبة اللي بك يليق

احذر تصاحب شخص باعماله يحاول يدخلك
في نار حمرا حارقة والحقد يشعل به حريق

لاتأمنه حتى ولو شفته بعينك كالملك
واختر صديقاً مثل ماقالوا يعينك عالطريق

صديق وافي لازهمته فالمهمة يوصلك
كالغيث ذي يقبل وله بارق قوي يبرق بريق

رفيق في كل المواقف لاحضر بايجملك
عزه ولا تاخذ من الاعراب غيره لك رفيق

ورفيق وقت المصلحة وليا أخذها يجهلك
ارمه ورى ظهرك وسيبه مرمي بوادٍ سحيق

هذه نصايح قلتها مخصوصةً ياصاح لك
من راس شاعر لابدع مايقطف الا من رحيق

شاعر مع الافكار له دورات تشبه للفلك
يلعب ويتلاعب بخصمة لاعب وكبتن فريق

© 2024 - موقع الشعر