جرّة الخط

جرّة الخط وهجوسي بميقافه
جرّة ذويبن تعلّى من الحَرّة

الغثا وصدوف الايام تحتافه
ما بقى فيها مقاضيب للكرّة

ليت همك كاتمه ما حدن شافه
ولا تبات اقران ضيقتْك منسرّة

ولو يضيق الخالدي يرعط غلافه
ساقها بالقاف درة .. ورى .. درة

واثقٍ جملة عزاويه وقّافة
مستعدة للندا خيره وشره

لو ينادي وينها بذرة أسلافه
تطحن الصمّ الصفاويّ وتذره

لابتي قلب الوغا ماهي اطرافه
والحبارى كانت لعينها قرّة

لو تجضّ .. الخالدي يحدد اهدافه
سالفتها مابها مزوح بالمرة

الوفا والطيب والمجد وخلافه
جاتهم من وارد الجد مجترّة

الردى ماهو يعرفه ولا يخافه
يوم حده يشطر الكفر ويفره

درّ ديد المرجلة وانعش آلافه
كل ورعٍ فالمهد لازم يمرّه

من تجوّد غارب العز ما يعافه
لو غدت أوراق الاعمار مصفرّة