قلبي تقطع

لـ اسيرة الصمت، ، في غير مُحدد، آخر تحديث

قلبي تقطع - اسيرة الصمت

قلبي تقطع حدّته حر الاشواق
يوم ان طرا لي زول وليدي حمود

نار لهبها بالصدر تحرق احراق 
احس بإن اضلوعي من حرها سود

أنا أشهد فراق الضنا هو الفراق 
وفراق ما سواه ما هو بمعدود

يا حر نار البعد يا حر الفراق 
مالي جدا غير الصبر كود يا كود

أشرق بدمع العين واشهق به اشهاق 
وما ظنتي عني هالأيام منشود

يا حمود ياللي حبك بوسط الأعماق 
يا الطاهر الطيب ويا أزرق العود 

بعدك ترى هالبيت والله ما ينطاق 
وغرفتك تشعل نارها بالحشا بزود 

أشوف انا اغراضك وما يشيلني الساق 
أطيح لا من شفت شاحنك ممدود 

كني جريح غارق بدمه اغراق 
والا طريح بالعصا وسوط مجلود

والله ما أرخصتك ولا بعدكم راق 
للنفس لكن قلت اببدي بمجهود 

أشفق على شوفتك يا وليدي اشفاق 
تشهد علي عيوني ودمعها اشهود 

طيري وبالرضا أنا اطلقته اطلاق 
فرخي وطيرته وهو محرر قيود

شفته وعبر النت من بين الأفاق 
وبيني أنا وبينه مسافات وحدود

في بيت ناس لا قرابة ولا رفاق 
يا جعلها عليه بسهود ومهود 

من ربع أوباما شكل وأخلاق 
حد الشمال اللي غطته البرود

لا صار ليلي عندهم حزة اشراق 
عندي اختلاف الوقت ذا شي معهود

عين الولي ترعاه وترفق به ارفاق 
يالله سخر له من اعبادك اجنود

يالله ياللي رافع سبع الاطباق 
يا سامع داعيه وعباده ارقود 

ياللي امره السحب ساقها اسياق 
ياللي من دعاه بالخير موعود 

يالحي يالقيوم يا رب رزاق 
يا رازق خلق وهو رب معبود 

أدعوك وانت الله رب وخلاق 
رب. كريم وما غيره ابا الجود

أسألك تحفظ لي أنا خضر الأوراق 
عبدالعزيز أحمد واخوهم حمود

وصلاة ربي عد ما ناض براق 
واعداد ما هل المطر وانبت ورود

على نبي امته ليه تشتاق 
شفيعنا وابو مقام محمود

© 2024 - موقع الشعر