الشعر احساس وشعور

لـ علي باعوضة، ، في غير مصنف، آخر تحديث

الشعر احساس وشعور - علي باعوضة

قالوا لي ان الشعر احلاه اكذبه
وانا اقول الشعر احساس وشعور

احساس صادق من معاناه نكتبه
بين الضلوع العوج تنبت له ازهور

هو مركبي في غبة البحر اركبه
وهو سلوة فؤادي ليا صار مقهور

من صغر سني اعشقه موت ولعبه
وسهر عليه الليل وسبح به بحور

له في حنايا القلب والروح مرتبه
بيته هنا في داخلي صار معمور

ياعاشقين الشعر والشعر اعذبه
افكار شاعر في مخيلاته ادور

ماهي بافكار(ن) خطيرة ومرعبه
ولاقصايد صايرة كلها اكسور

وش قيمة الشاعر اذا خان منصبه
وصارت حروفه كلها تطمس النور

المصلحة ماغيرها كان مطلبه
يوصل جسور ولجلها يقطع اجسور

شاعر بشعره باع دينه ومنسبه
مادري علام الناس خلوه مشهور

وشاعر ياكم من كنز مكنوز ينهبه
وآخر بيزنط منتشي صابه اغرور

ومثل ذالك مااطيقه ولارغبه
ولا لي بقربه شاعر الكذب والزور

ولّا شعر لجواد لفكار تشربه
واعتز لاشفته يعانق له اسطور

الجيد واجب كل انسان يكسبه
والشاعر الموهوب تلقى له احضور

كلماته الجزلة في الشعر مذهبه
حتى ولو مايملك اليوم جمهور

يجمله فكره اذا جد واتعبه
تلقى قصيده يشبه الدر منثور

كذا نريد الشعر ياخذ من اطيبه
ولا وخلو حاله اليوم مستور

© 2024 - موقع الشعر