المرجله - ماجد عواد السعدي

المرجله ياللي تبيها ثقيله
عسره عن اللي يكره الطيب والجاه

المرجله ماهي فتاة ٍ هبيله
خفيفةٍ يغمز لها ثم تتلاه

ولاهي سواليف ألف ليله وليله
اللاش عنها دون تبرك مطاياه

مانالها اللي مايخاف الفشيله
هذاك خاب اللي من الناس ينصاه

يالأجودي ولد المره لاتجي له
عنّي ماتبغى منه ماعاد تلقاه

أمه معلمته يجمّع حصيله
ماعلمته الطيب وشلون ممشاه

عنّه وعن من يشبهه مستحيله
الكوع ياصعبه على حبة شفاه

مانالها إلا من يطول النفيله
كفه على فعل الجمايل مضراه

اللي يعرف الواجب ويرتكي له
وجهه مابين أهل الوفى حافظ ٍ ماه

انصحك خل اللاش واترك سبيله
تكشف لك الايام لوزيّن حكاه

دور من اصحاب الفعول الجزيله
يالاجودي مبداك ماهو بمبداه

دايم يعزم اللي تبيه الخليله
والواجبه عن فعلها تقصر خطاه

والسوق يعرف كيف دربه يجي له
ماضيّعه لوهو مشى له بعمياه

ويالبيض ياللي تنقضن الجديله
اللاش شومن عنه لارحم مجناه

الطيبه تكرم لمثله حليله
يلقى من الرديان مثله وشرواه

وحرمٍ علي راع الردى ماأعني له
وكلٍ نقدم له على فعل يمناه

تمت وأنا ماقلت عندي كفيله
من صارع الأيام والوقت يلقاه

والشعر مرجع للزمان ودليله
كم ضايع ٍ له حق والشعر قداه

يأخذه جيل ويستلم منه جيله
نفنى ويبقى للعرب ماكتبناه

© 2024 - موقع الشعر