ومن لايقد المرجله ماتقده - عبدالله فهد الشمري

قلبي يكن وبالهواجيس مزحوم
وعيني لذيذ النوم طاري يلده

مهدوم يابيت المناقيد مهدوم
لابد ماالايام تسرع بهده

وش عاد لو راعيه بالمال مردوم !
ماله كثير ولا لقى من يعده

ماينفعه لامال وقصور وختوم
لاصار ماله مع هل الطيب مده

المال بين الناس قسم(ن)ومقسوم
وكلن عطاه الله قسم(ن) يسده

وانا ظفرت بشي عدا عن اللوم
لامال لا سلطان لامُلك جده

اليا حملت ثقال وأزريت ِلاقوم
مليون واحد من يشيله بعِضده

الله رزقني خوة أشناب وقروم
ولا الردي أجزيه بالعون صده

الحرد يفرد في جناحيه ويحوم
ويهد ولا البوم مامنه هده

مازيد بالموال وعلومي علوم
ولاودي أظِهر ماخفاكم بشده

العاري الجردان" نستره" بهدوم
ومايرضي النعسان غير المخده

والطيبين علومهم نسمعه دوم
ومن لايقد المرجله ماتقده

© 2024 - موقع الشعر