المارد - خلف الأسيد الشراري

تعال وانهب ما بقابي من احساس
خذ حصتك ياذيب بين الذيابه

ياذيب انا ماني مثل باقي الناس
راحت حياتي كل ابوها نهابه

راحت كذا مابين دايس ودواس
طعنةليالي والليالي تشابه

ماعاد تفرق لو غدى الجوهر نحاس
عندي تساوت كوبته والمهابه

هجرت سوق الحب واعلنت الأفلاس
والمارد المفتوح صكيت بابه

قلباً طواه الشوق وغصون يباس
مابللت شوبة ضماه السحابه

يكفيه ما عناه مسرى ومنكاس
مع بارقاً يشبه حضوره غيابه

وقفت اعزي فيه واقول لاباس
جرح الهوى لا بد يبرى صوابه

لحظة صفا مدري هواجيس وسواس
مير الوكاد اقنعت حضرة جنابه

ياذيب ما باقي سوى هومة الراس
تختال بايام الصبا والصبابه

ياذيب ماهانت ولا صابها ياس
شفها على القمه بصدر الرحابه

ما تنحني لو حاصروها بلاقواس
فيها الشموخ اكبر من الكون نابه

مقياسها يفرق عن الفين مقياس
في عالماً كله هموم وكأبه

دورات وقتاً ضيقت مجرى الأنفاس
فيه الوفي راحت حياته نهابه

© 2024 - موقع الشعر