دمع الفرح

دمع الفرح ي (غير) ذا الدمع وإلّا
دمعة اسى والآم وهموم ي (غير)

ي (غير ) والله فيني الصبر ملّا
دمعك يدمر حاجز الصبر ..تدمير

قولي وش الأسباب تكفين .. هلّا
ابغى الحقيقه ليش ..ماريد تبرير

قولي وانا ب اقول ..ليت ولعلَّ
ميكون خلف الدمع من بدر تقصير

اخاف طيفي لو بالأحلام ..زلّا
بالنوم جاء ماقال لك يامساء الخير

ورحل وظنيتيه عنّك ... تخلّا
والطير مخدم ..بس من طيّر الطير

او جاك واشي للظروف استغلّا
واشعل فتيل الشك بك نافخ الكير

حلف خبيث الطبع لك واستدلّا
بعلوم سطرها بكذب(ن) وتزوير

بِلا كلل يعمل.. لفرقاء الأخلّا
يبيع عمره لجل يفسد هوى الغير

وقال ان جايز في سماء بدر حلّا
نجم(ن) جديد وغيبتك المقادير

اصلاً من اول كان ..فيك ايتسلّا
ويخدرك في حالي الهرج تخدير

واقول انا ي (غير) حاشا وكلّا
يهون عمري ماتهونين ي (غير)

ي (غير)لك بأقصى الضماير محلّا
وحدك سكنتيني وغيرك مسايير

وحياة من فوق الخلااايق ..تعلّا
مافكر بغيرك ولو بس تفكير

ببقى معك عن حارق الشمس ظلّا
واحميك انا عن لسعة البرد واجير

واحضنْك ياما دمع عينك ..يبلّا
روض الغلا فيني وينبت معاذير

وبالقلب نامي ..يابعد كل خلّا
نامي قريرة عين من دون تفكير