بنك التجارب

تقديرنا محفوظ عند اخويانا
اللي لهم تقدير عند اخوياهم

المحترم غصبٍ على البعد جانا
ﻻكبرت الدعوى ماعنده تفاهم

اما الردي لو كان ضمن اقصرانا
على التواصل ذلك الشخص واهم

أهل الردا عنهم بعيدٍ مدانا
دايم بعيد وقالع الله مداهم

فعلاً ترا ماهم على مستوانا
حتى خطانا مايشابه خطاهم

نخطي ولكن ماجحدنا خطانا
وهم ينسبون ذنوبهم لقصراهم

مادري قهرهم نجمنا في سمانا
واﻻ ماشافوا طيبنا من عماهم

يادورة اﻻيام ردّي ورانا:
أهل الغثا يرجع عليهم غثاهم

واللي تذكّرنا ونسي ونسانا
مثل الذي يدفع لنفسه دراهم

جمله مفيده من مصادر خفانا
بنك التجارب ردّ ربح المساهم

وحنّا ترانا مانوجّه ندانا
للي مظاهرهم تخالف خفاهم

في حزّة الشدّه نعرف اعملانا
اللي نلبّي فالشدايد نداهم

والرجل لو انّه من الناس عانى
يخفي عنا روحه ويذكر عناهم

اليالقا فرصة وفا ماتوانى
لو يطلبونه من حلاله عطاهم

هذي عوايدنا وهذا هوانا
عوج النوايا مانوافق هواهم

أهل الصراحه ربعنا واصدقانا
واهل البلايا يرفع الله بلاهم