في محطّة القطار

قهوَتي مرّه .. و إحساسي .. أمَرّ
واللي أمَرّ منهم .. شعور الانتظار

في المحطّة ..انتظرت انّك ..تمِر
لين ضاع الوقت ..وْ ضيّعت القطار

كنت أبني معْك لأحلامي … مِمَر
و اثري كنت ابني لأوهامي .. جدار

في يديّاّ قلبي .. و الورد الحمَر
لو نِظَرت فداخلِه تلقى .. ديار

هات أزرع خدّك الناعم ..ثمِر
قبْلة ٍ منّي ....تساوي الاعتذار

انت منت بشمس .. انت منْت بقمَر
انت شيّ ثاني .. يثير الانبهار

من خِلط في صوتك الشهْد ..و الخمر
ليه مِزَج في وجْهك الليل ..و النهار ؟

من قِطَف سحرِك على الخصْر الضمِر
يا رغَد حسنك .. تحْت هذا الخمار ؟

كنت أحبّ البيض ..ما أحبّ السمِر
لين أحببتِك .. و أحببت السمار

يستمر الحبّ .. او .. ما يستمَر
من يساعد قلبي .. في أخْذ القرار

قهوَتي مرّه .. و إحساسي .. أمَرّ
واللي أمَرّ منهم .. شعور الانتظار

انتظرتِك .. في محطّات العمِر
لين طاف العمْر و طوّفْت …. القطار