هاماتنا اعلى من ظهر نايف الطود

يا ابو فهد يا ملتجا كل مظهود
يا مزبن اللي روّب الهم دمه

ياللي بفعلك في الرياجيل محمود
ورقيت به في كل عالي وقمه

جيتك دخيل وجيت مُجْبَرْ ومحدود
وانت الذرا لا جات خطوا المطمّه

انت الملاذ لكل خايف وملهود
والي يبا ينطحك ما جت به امه

لو هو فحل ومعربٍ خال وجدود
يرغي ليا شافك ويبرك بهمه

لو هو وريث شداد واجداده فهود
والله ليخطي الدرب منك ويخمه

يا ابو فهد حنا سراحين و اوسود
منّا ضعوف عزاز منّا بخمه

هاماتنا اعلى من ظهر نايف الطود
ونفوسنا فيها عن الضعف زمّه

والله لو انه يوم طارد ومطرود
يوم الفتى ملجاه لعيال عمه

انه لتروى منه مسمورة العود
لين التراب براس خشمه يشمّه

يالخامسي قدّرت انا لحية العود
والا ترى لو ذاق نابي وسمّه

والله ليرجع عقب ما شق مفرود
ويجفل وانا يوسف ليا اغضيت يمه

والعلم يمّك يا ابيض الوجه مردود
لأنك كفو معروف لأصعب مهمه

عادتك يا فيحان يا مدرك الكود
تجلى عن المحتار همه وغمه

ما جيتك ابغى منك تهداه ووعود
تم الطلب في الحال طالبك تمّه

الشاعر / يوسف العضياني