ان غاب نايف كلنا اليوم نايف - عبداللطيف العوفي

آمنت باللي له عبيده مطيعين
اللي بكل الخلق راحم ورايف

المبدئ المنشي خلقنا من الطين
ومردنا موت ونشور وصحايف

يالله ياللي لك عبيدك منيبين
يامنزل الما من حقوق القنايف

رحماك في نايف من العسر الى اللين
واجعل مقامه يوم الاشهاد نايف

يارب الى منّك نصبت الموازين
اجعل ذنوبه هينات وخفايف

نايف قطع بالارض روس الشياطين
نايف نصر دينك ولافر خايف

نايف - ولا ازكّي على الله مزكين -
ازكى من انفاس العطور الهفايف

يارب حنا بالقدر منك راضين
لو الدموع من المدامع ذرايف

نرفع لك كفوف الضراعه ملبين
عبدك قبضته ماشكينا حسايف

لكننا بعفوك ورحمتك مرهين
وايماننا ثابت ولاهو مسايف

واجبر عزى سيد جميع السلاطين
المومن الصادق عديم الوصايف

مولاي ابو متعب نقي المضامين
وازيل عن كتفه جميع الكلايف

حنا لبو متعب جنودٍ مفادين
جميعنا بامره دروع وقذايف

على كتاب الله وعهده موالين
رجالنا والمحصنات العفايف

كل الوطن جندي على سنة الدين
واللي يعادينا ذليلٍ وخايف

قولوا لكل المرجفين المظلين
والمارقين من الملل والطوايف

مادام ابو متعب وسلمان حيين
فليندحر ولينكشف كل زايف

حنا على نهج افضل الخلق ماشين
وان غاب نايف كلنا اليوم نايف

والشعب والزوار واللي مقيمين
جميعنا لنصرة وطنا ولايف

والحاقدين المفسدين الرديين
احقادهم ترجع عليهم نكايف

وآمين ثم آمين ياربي آمين
ان تجعل الفردوس مأوى لنايف

جعله بعليين بين النبيين
والصادقين اهل القلوب النظايف

عبداللطيف العوفي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر