غبار الجهل - عبدالعزيز الشاطري

يالقاضي وينك عن مفاهيم النقاش
والا على فكرك رسومات ونقوش

والا خذتك ام الحمية والهواش
والا تحسبنك من السلطة تحوش

تراك لو انك مراقب مانت باش
كانك سبع قدامك سباعٍ وحوش

لو غصت بحر الشعر بعيونك غباش
ما تسلم الحيتان من فتك القروش

مادام صار اول قرارِ منك ماش
ما تنفع تقود المعارك والجيوش

ذكرتني ما دار في صدري وجاش
من عام الاربعين صار الحكم هوش

بغداد فتنتها نفاقات وحراش
والمالكي متورطٍ باسباب بوش

والناس صايبها من الخوف ارتعاش
تبني على الامال والفرحة نعوش

والنور لامنه سطع حام الفراش
ويموت مادامه على حيده ينوش

مرت سحابة صيف وانت ارضك هشاش
عدّت قصور الحكم من حول العروش

ما تسقي الرعيان وكبودٍ عطاش
والظامية تلهث على عظم مْعروش

وْمادام ما ناشك من الغيمة رشاش
انفض غبار الجهل من فوق الرموش

وانصحك يوم النصح هالحينه بلاش
والله يرحم ناس تدفعله قروش

ارتك على مركاك فوق انعم فراش
واترك مجال الفلسفة دامك خروش

© 2024 - موقع الشعر