وجه المداين - محمد المصعبي

هذا أنت ياوجه المداين ماعثى فيك البعاد
اللي عثى في مهجتي من يوم صوّت لي سفر

زاهي على عهدك ولا مسّك من أيامك سواد
مثل السواد اللي تغافلني وصبّحني فجر

جيتك بعدما غبت عنّك غصب والدنيا جهاد
تحداني الدنيا قدر وأصبر وأسايرها قدر

بقعاء تصيّرني لك إبن جبير في جوب البلاد
ومن تذكرة الأخبار خذ مني الحكايا والعبر

رحلة غيابي عنك تيه وضيم حال وسم زاد
والله رضى لي بالنجاه وجيت لك وافي شبر

جيت أقتل عباب المدى وأقطف من أحلامي حصاد
ولولاك ماجازفت أنا في وجه لجّات البحر

متشجع بخفاق إبن صمه وحنكة بن زياد
وأضرب برمح الشنفرى وبسيف إبن يكرب عمر

كم بي من الدنيا طعون وممالها عندي ضماد
لكن عزاي إن عاد بالدنيا من طعوني أثر

ماطعت أخلي حاجتي والراس يملاه العناد
ونفسي إباها ماسمح بإني أكون المنكسر

فسايل أحلام الصبا وش عاد لو صارن عياد
حرام لو راحن كذا ما خذت لي منها ثمر

وجه المداين ضمّني شوق ثم دف الفؤاد
عن زمهرير غيابي ورعشة وقوفي لك صبر

ياغاية أعوام الشقا ونهاية فصول الحداد
ياإكسير بارد للحياه يطوّل الشاعر عمر

خذني ولو ضوّي خفت والجمر غطّاه الرماد
نسناس روحك لا نفح توقد له النار الجمر

من شهرزاد الألف ليل وليل لي ليلة وداد
ماهي على شطّ البحر هناك في سطح القمر

لك تنحني ريحي أدب والهاجس أتزبّر مداد
يمطر لك سنيني شعر وأيامك لحالك شقر

خذ من أريج إبداعها الفوّاح لك مسك وزباد
مادام حال وصالنا شلال نهر ٍ منهمر

نبعه من الوجدان يتدفق على نبض الحماد
يقتل ضماه وحطمته وأحياه بأنواع الزهر

دام النوايا وضح ولك تنساق مني بإنقياد
سق لي بدلها وضح والخلفات لك فيها شكر

وإن كان ماطاوعتني جعلك مثل شداد عاد
اللي بناء الجنّه ويوم أتجهزت موته حضر

وبعود أنا لأيامي وجوب الفيافي والنجاد
جيتك وأنا وافي شبر وإن رحت أنا وافي شبر

© 2024 - موقع الشعر