ام العيال تبي تسوق - علي الزهيري

ياهل العقول الراجحه وش السواه
ام العيال تقول ابي رخصه بسوق

المحصنه قامت تخطفها الرحاه
غرابها الاسود على الشرفه نعوق

ياليتها بالشرع وحكّام القضاه
ان كان مايسعى بها العقل الطفوق

ولاية الرجال صارت للولاه
ماعادله سلطه ولا يملك حقوق

لاوا حليل المستحي لاوا عناه
شربوا غبوقه مابقا عنده غبوق

هذا الزمان إيروع يامكثر بلاه
حتى عيال العود صايبهم عقوق

كلٍ على ماقيل يتبع مشتهاه
الى ضوى هذا سرح هذا بنوق

لكن ياوجيه السعد هذي وصاه
لو كان توصل بيننا لزم الحلوق

الفارس اللي ما وقف دون الفلاه
تكفون لا يقلط على شحم الفروق

ويالله ياللي مايخيب من رجاه
تزّين الاحوال وتزين الوفوق

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر