ياصديقي

ياصديقي كان باقي بهالوقت اصدقا
لاتشيل هموم دنياك والدنيا سراب

مثل ماتلقا سعاده تبا تلقا شقا
والزمن ماضي ولابه حظور بلا غياب

إن شكيت من المفارق ترا باقي لقا
من فقدته يمكن تحصّله يوم الحساب

وان توقّعت السلامه على وضح النقا
وابتلتك هموم وغموض , يكفيك احتساب

لاتفكّر كم مضى من زمان وكم بقى؟
ثمّ تدخل في متاهه وضيقه واكتئاب

ركّز التفكير باللي نزل واللي رقا
واخذ من هذا وهذا مفاتيح الصواب

التجارب مدرسه والمدارس ملتقى
تجمع اصحاب المهمّات شيبان وشباب