وحدة مرض والثانية صيدلية

يامّ العيون اللي لها الليل الاسود
كحلٍ من الباري معه جاذبيه

في رسمها بين المخاليق تحسد
واخيلها في كل صبح وعشيّه

منها حياتي كلها صدٍّ ورد
تلعب عليّه بين روحه وجيّه

والشوق يتبع طيفها وين ما شد
لا مرّت انْسام المحبين ليّه

ما غاب لو ان الليالي تمرّد
وان غاب عن هذيك صوّرت ذيّه

مريضة الاجفان والحد مشتد
يشكي من ازعاج المشاعر شويه

القلب يبرا من مرضها ويرتد
لا دقّت رموش الغلا لي تحيه

هي علتي ودواي من وين ما لد
وحده مرض والثانيه صيدليّه

آخر علاج الناس كيّة على عَد
واوّل علاجي منك بالرمش كيّه

ما دام رمشك يادْعج العين له حد
وْجروح قلبي منه دايم نديه

خليك جنبي لا تخلين للصد
والهجر والحرمان دربٍ عليّه