خلخال

البارحة طاح من غصن الليالي سؤال
..وضيعتني بين اسالتي .. وتخميني !

شلون انيمك في ضلعان صدري شمال !
..واصحى والاقيك متوسّد وسط عيني !!!

ياللي اذا جيت بشبهّك .. مالقى مجال !
.. ماغير اعنّي الورق طيش واعنينّي !

اركي القلم ع الورق والحبر يومه سال !
.. كان الجنا بس شخمطتي وتلويني !

احيان احسك نقاء النور بعد الظلال !
.. واحيان اقول انك .. هلّة غيم ترويني !

واحيان اشوفك خليط ..أشياء ما تنقال !
.. كاظم يغنّي نزارية " أحبيني "

اليا مشت هيه .. ي معزوفة الخلخال !
.. وخلخالها تلبسه منشان تغريني !

واليا اوقفت جيتها لو ما ازهمتني تعال
.. من زومة الصدر .. أحسبها تناديني !

في شفته فلسفات السكر والاعتلال !
.. ريقك خمر توت ومعتق له سنيني !

خمر(ن) من ايطاليا مقطفيه ايطال !
.. مقطفينه مثل مانتي قطفتيني !

ومعتقينه قبيل الحرب .. والاحتلال !
..ويومه عرض " للنظر " في بار برليني !

ي توت مسكر حرامك في عيوني حلال
.. تكفين من خمر توتك .. انك تسقيني !

ي اجمل من الشمس لا طلت جنوب الجبال
.. يا ارق انسان بعثرني و سكن فيني

وشلون تقسى علي وانت نقو الخصال !
.. وشلون تسمح امش الدمع بيديني !

وشلون فيني تطاوع هرجة العذّال !
.. وانا وقلبي عن العاذل مقفيّني !

وانت الذي اشتكيك الهم والغربال
.. واليوم شكواي منك ي معنيني !

وشاعرك .. شبحه سما .. ماناطح الا جبال !
.. ودمعي مهو ضعف يومنّه غشا عيني !

لكن انا اعشقك عشق البدو للدلال !
.. وادري انا مثل ماحبك تحبيني !

تعالي ي ام الغنج والزين ي م الدلال
.. ي كلّ ما املك وي باقي سنيني !

تعالي نغيض فينا كل هالعذّال
.. هاتي يدينك في يديني وضميني !

ونامي هنيه ف ضلعان الصدر من شمال
.. واليا عيونك صحت ميلي وبوسيني !