مرد الانس تدفن في ثراها وارضها حدري - احمد بن مطر الهاجري

احس بضيقةٍ عقبك تجيني وانت ماتدري
يضيق الصدر وياها وفي عيني يضيق الكون

اليا مني تلقيت الشمال وعارضن صدري
هبوبه ماشرحت صدري ولا زاحت غثا المكنون

ياليتك تدري انك بالتغلي ناويٍ غدري
تغييب ايام ثم ترجع وانا عقبك ترا مغبون

ابد ماهي كذا العشاق ترضا بقدرك وقدري
اشوف الصبر ماينفع معك بالذات يالمفتون

حلاك الزايد وطبعك طغى مع رمشك الخدري
نسيت الحب واسبابه نسيت اني معك مرهون

قبل لاغبت عني فيك شوقٍ يرجعك بدري
تبادلني الشعور وفيك شوق وحبي المصيون

ليالينا اكسفت وجهك وقفا وجهك البدري
ماعاد القا الوفا فيك انت يامن كنت ذخر وعون

مرد الانس تدفن في ثراها وارضها حدري
عسى تفهم كلامي زين يامن لك اذن وعيون

© 2024 - موقع الشعر