عيــدية حبيبي .!

بديت بسلام ٍ عد مافي سماي نجوم
عدد وبل غيث ٍ هلته غر الامزاني

سلامي عدد مايشكي الحبس من مظلوم
وسلامي عدد مانفذ العدل في جاني

وسلامي عدد مالاح برق ٍ بعرض غيوم
وعدد ماسجع ورق ٍ على خضر الاغصاني

سلام ٍ عبيره نفحة المسك واليشموم
على نور عيني نبع احاسيس وجداني

اللي من فراقه مابعد ذقت حلو النوم
الا عقب تغرق ماتحت راسي اعياني

أهديها سلام وشوق مع كل مطلع يوم
وأدعي في سجودي له بعفو ٍ وغفراني

انا راضي ٍ باقدار ربي وبالمقسوم
وعندي يقين ان العمر مابقى فاني

عسى الله يجمعني بها في نعيم ٍ دوم
بجنة خلود ٍ مانبي غيرها ثاني

حتى لو رحل ماني من معايده محروم
مافي القلب له من قدر غنى به لساني

سلامي على قبره نهاية ليال الصوم
عيدية حبيبي قبل الاقصين والداني

عيدية فراق وحزن من خافق ٍ مصدوم
عيدية وداع ٍ حبرها دم شرياني

عيدية ضمير ٍ حط فيه الفراق وسوم
بعدغاب عني نور عيني وخلاني

سلامي على قبر ٍ عسى ساكنه مرحوم
قبر ٍ ٍ به حبيبي نبع احساس وجداني

تركي الشدادي