الرانج روفر في مهمّه - عبدالعزيز الحربي

أركب على اللي لاركبته واستويت مع الطريق
تطري عليك اشعار ابن جدلان يوم انه شباب

مشي وركود وراحه وسرعه وصدرٍ مايضيق
خمسة شروط اليالتقن فكّن لنظم الشعر باب

الموتر اللي صانعه ماهو من الاصل العريق
من قوم قيصر ياعسى داره مايسقيه السحاب

فكّر وخطّط عابد الاصنام بالفكر الدقيق
حتى توصّل لابتكار الرنج يوم الحظّ طاب

الياركبته تشعر انك ضابط برتبة فريق
الحظّ قدمك يبتسم والناس تحسب لك حساب

بعيونهم كنّك مدير البنك او كابتن فريق
لو كنت جندي بالحرس واحلامك الحلوه سراب

كلٍٍّ يحسب انّك مريّح وانت بهمومك غريق
تنقل همومٍ شيّبتبك لين كلّ الراس شاب

لكنّك بنظراتهم تاجر ولك باعٍ عميق
بالجاه والتوجيه والوجهه وسرع الاكتساب

هذي صفاتك لاركبت الرنج ابو وجهٍ طليق
صنع النصارى والنصارى سلمهم عكس الصواب

الاّ بميدان الصناعه وضعهم دايم يليق
معطيهم الخالق وممهلهم إلى يوم الحساب

ياحضرة السوّاق لايلهيك من دون العقيق
الاّ وقوفك للصلاه وللوقود وللزهاب

ولياوصلت الديره اللي من على القمّه تويق
سلّم على اول من تقابل منهم وعطه الكتاب

ياديرة اكرام الضيوف وسدّ حاجات الرفيق
ومساعدة جميع من يحتاجك بوقت الصعاب

الطيب عنوانك ودستورك ودايم لك عشيق
عسى محبّك للسعد عسى عدوّك للذهاب

© 2024 - موقع الشعر