الحب جبري - تسأل الي من غلاها ساق عمره مفتديها

تسأل اللي من غلاها ساق عمره مفتديها
لو هي بْحاجة خفوقه / مدّ في يدّه خفوقه

والله انّ القلب فدوة / بسّ هي تشّر بيديها
علّموها الحبّ (جبري)!!/ حرّ عينيها سبوقه

وعلّموها ! كيف يعني جْبور / لا يصعب عليها
الفتى منّا مهبولن من حُسامه لي طروقه

حنّا يا بنت القروووم / الحرب حنّا نبتديها
وحنّا من شدّنا الممالك /والرّعد يلحق بروقه

وعلموها والله انّي لو تبي لاغزي لابيها
ايه ابغزي له لعيناها ووالله ما ابوقه

يا مْهبوله / ما عرفتي ويش يعني إن قلت ابيها
يعني هذا انّ القريشي قدره تْشرّب مروقه

حطّها في راسه اوّ والله فيها وش مفيها
لو بها سبع القبايل / ما احجبت عنّك شروقه

القريشي لا عشق مجنون ٍ وفمّه بفيها
و الهوى ميدان وأنا فارس ٍ مدمن نشوقه

وعلموها /الخالدي قلبه على الكلْ مصطفيها
اوّالله ان تبطي / وهيّ لحالها حبّه وشوقه

بنت قرم ٍ لا تعزوا فزّ له / لبيه أخيها
عشّق كلاشه وشدّ عْمامته/ محْدن يعوقه

الكريمة العزيزة النّجيبة مهتويها
عاشقن مجنون تجري كالدّماء داخل عروقه

لو حجبها الموت الاحمر /عن عيوني لا أجيها
اقدم اقدام الشّهيد / المحتزم والموت سوقه

مرخص ٍ عمري لعيناها وكلّي مشتريها
سايقن روحي وقلبي يمْ مواردها اسوقه

علّموها / فات شرح السالفه واللي يليها
من بعد سوق القوافي جاك شاعرها بنوقه

يالعزيزة لو تبين المستحيلة اطلبيها
لبّى والله ما طلبتي / عنده مْن ألزم حقوقه

لو تبين الشّمس تشرق من شمال ٍ / آمريها
لا نتخي بعيال عمّي / وتلّو الشّمس (ا)مْخنوقه

لا نتخي عْيال القريشي / حاجتك بس اذكريها
ولعنبوا جدّي إذا ما خلّوا الدّنيا (ا)مْحروقه

ما لعبنا (القيم بوي) بصغرنا / ولا نرتجيها
طفلنا من يوم يومه لعبته / سرج السّبوقه

ناطى بالرّمضا حوافي / ومن شكاها مكتويها
ما يخاوينا لما ياطى على الجمر ويروقه

كان شفتيني مْهبولن بايعن نفسه / خوذيها
ما بعد شفتي من الْجبري / سوى حزّة غبوقه

احدنا لا حبّ حبّ / ومهرته هو مفتديها
ون عشق يا بنت / وافي / مدّ في يدّه خفوقه

علّموها القلب فدوة / بسّ هي تشّر بيديها
و علّموها الحبّ (جبري)!!/ حرّ عينيها سبوقه