منفى

غبيته عني نفتني في جزيرة
لا بها مأوى ولا زادً وما

وحالتي من عقب ما راحت خطيره
مثل من ضيع دليله ربما

لا ظهر لي نجم في وقت الظهيره
ولا تبين لي بليلي معلما

ومن سألني وين قضيت المسيره
قلت معرف قلت مدري معلما

ساقني تيار جفواها لديره
بموجةً في بحر موحش مظلما

آه يا رب عبدك من يجيره
أرفق بقلبه تعذب وأرحما

منهو غيرك يالرؤف أنا أستجيره
وأشتكي له لا بدت لي مظلما

وأنا وليتك كبير أمري وصغيره
وقلبي في دنياك لغيرك ما أنتمى

ماتمنن وأنت أعلم بالسريره
وكل ما أخفيه أنت به أعلما

لا بيزيدك قل شكري أو كثيره
وأنت ملكك غطى الأرض والسما

ولا بيضرك صغر ذنبي والكبيره
إن كفرت أو عبدتك مثلما

لآ كفر قوماً بدلته بغيره
يعبدونك في الصباح وبالغمى

منت عاجز ياللي وحدك يستخيره
كل مخلوقً في أمراً رمى

عبدك النيب جهل وشهو مصيره
لن قلبه بالمحبه أرغما

ساق قلبه عينه اللي مستديره
وصاب قلبه قبل عينه العمى

ومن تغيب صاحب النظره المثيره
تنزل الدمعه من عينه دما

غصب عنه صار له نفسن كسيره
هذا حاله ومن تولع واغرما

ربي أرحم منهو مثلي ذا مصيره
ومنهو صلى لك ولبى وأسلما