موعد غرامـي

وش هذا الزين .. كلّه يا عَرب ؟
جتني المعشوقه في موعد لقاي

جتني ترتع في مراتيع العِشِب
ظبية ٍ .. تخطي على عزفات ناي

يا نسيم إرفق عليها .. لا تهِِب
خصْرها المايس معَك رايح و جاي

جيدها نهْر ٍ على الانهاد صبّ
حسنَها الجذّاب يترقرق جِداي !

جيتها .. و قلبي ضما منْها و شِرَب
رشفة من قلبي .. و رشفة من شفاي

قالت ( اشتشرب ؟ ) .. و ارختْلي الهِدَب
قلت هذا الشهْد يرويلي ضِمَاي

لاعبِي خفّاقي .. يا محلى اللعِب
منْك يحلالي و يسعدلي مساي

استمالت .. لجْل تسأل وش كِتَب ؟
شاعري المحبوب .. في نظرة حَلاي؟

قمت اسرح فيها ( ساكت) و السبب
من يصدّق بأنّ محبوبتي معاي؟

إزعلت مدري دلع .. ولاّ .. عتَب
أثْرها .. غيمة تقِول الدمع جاااااي!

" هل سكوت عبيد هو قلّة أدَب ؟ "
او لأنّي أعشِقِك هذا جِزاي !

قلت لا تذرف دموعك يا محِب
كيف تبغيني أعبّر عن هُواي ؟

سلهمي طرفك يا نعّاسة هِدَب
" العيون الخدّر " أعزّ أصدقاي

لو أجيب الشمْس و أمزجْها بسحِب
غير وجهك وش يشابه .. يا غلاي ؟

شاغِبِي عمري .. انا احبّ الشغَب
في حضورك أرمي الدنيا وراي

يا ابتسامة حظّي .. يالصدْر الرحَب
كالقمَر ودّي احطّك في سِماي

آه فديتك إضحكي ... و قولي " يارب ! "
" أقضي ايامي معِه .. و يبقى معاي "