الروح ترفض

من قال لك ود الغلا قسمة أثنين
كذاب مازيّن دروبك غنيمه

دبر لك الفرقى ولاوع بك البين
حتى غديت بروح ماهي سليمه

هذا جزا من ينصت السمع للشين
اشرب عسى أيامك ليالي حليمه

الروح ترفض من سواتك ضعيفين
باعوا المبادي والقيم والحشيمه

أصبحت صفحه وانطوت من بعد حين
أكل عليها الوقت من دون قيمه

ماتستحق ذرة وفا ناس وافين
ولا طيب روحن في غلاها حميمه

لاترتجي ماتنفعك دمعة العين
الله حكم واحكام ربي عظيمه

الله معك لاتلتفت للمقفين
في حل من امرك بليا ظليمه

انا معي ربي على العسر واللين
فوضت له دمع العيون السقيمة

شعر / الملتاعة مكة