قصيدة : فهد بن غازي السلمي
شلال حبه مغرق قلبي اغراق
من يوم انا شفته وروحي خذاها
من يوم شاهدناه والفكر ما طاق
يفكر بغيره وينسى غلاها
حبه يابن غنام في القلب منساق
صارت جروح القلب تنزف غلاها
لو بوصف المحبوب عن وصفنا فاق
مهما وصفنا مالحقنا مداها
الوجه كنه شمس في وقت الاشراق
ياحمود تجهر عين حي راها
ابو ثمان ارهاف والريق ترياق
من ذاق طعمه ما روي من حلاها
لاهو غليظ عودها ولاهو دقاق
ريانة ربي بحسنه كساها
ياليت وان الوقت ما يطري افراق
وليا بغا يطيريه يطري لقاها
مشتاق له بالحيل ياحمود مشتاق
حبه بلا روحي وحبي بلاها
رد حمود غنام
يامرحبا من خاطر(ن) ما بعد ضاق
بالصاحب اللي صحبته ما كناها
يامرحبا به عد ما لاح براق
وعداد ما شفنا النجوم بسماها
جاني قصيده جامعة كل الاذواق
انا مع اللي معجبه مستواها
علقتها في وسط قلبي بمعلاق
نصف(ن) يحيط بها ونصف(ن) وراها
ان كان تشكي يافهد حر الاشواق
ياقرب ماها يافهد من ضماها
الحب قبلك محرق(ن) قلبي إحراق
والعين بالطاري تزايد عناها
يافهد انا حر(ن) مدرك بمسباق
يكفخ لكن اللي برجله ثناها
عشرين عام الجرح ينزف وينباق
اتذكره سود الليالي قصاها
مثل اليتيم اللي حياته تشفاق
امسى عشاء الأوهام وأصبح غداها
يافهد فكري طاف بي كل الاسواق
ما سلعة الا باعهاواشتراها
خلالها حقق نجاحات واخفاق
مهما عطت دنياك تِأخذ عطاها
دنياك ما يبقى بها غير الاخلاق
ما أكثر مشاكلها وما اكثر غثاها
يافهد والله ما لها معك ميثاق
مرة تدللك ومرة تباهى
أول غرائزها بدأ بالتذواق
واخر غرابيل الشقى منتهاها
واعلم يابو غازي ترى الرجل تواق
عليك بالعليا ولو شح ماها
ترى الهوى يعبر بك جسور وأنفاق
احذر تربيك الظروف بعصاها
هذا كلام الذوق من فيض الاعماق
وكل(ن) يموت وحاجته ما قضاها

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر