ياونـتٍ ونيتهـا عشـر مــرات

ياونتٍ ونيتها عشر مرات
من الزمان اللي جفاني جفيا

طار الكرا من موق عيني ولابات
فكري مع الأفاق و أنا هنيا

جميع ما حشته من افكاري اشتات
رغم ان فكري منتخيها نخيا

يا كثر ما مرت علينا من آفات
شكواي ل. الله ما لغيره شكيا

ياللي زمانك صار خير ومسرات
ترى المراجل ما تهيا كذيا

أحذر ترى درب المراجل مطبات
خلك على درب المعالي مهيا

بقعا لها في كل الاوقات صكات
الله يجيرك يا جميل المحيا

ما فات مات وكل من مات لو فات
كم ابلج(ن) له سيرةِ سرمديا

وكم واحد قد مات من ضمن الأموات
ميت وذكره مع هل الجود حيا

وكم واحد ميت وهو حي ما مات
حظه عن دروب المواجيب عيا

عايش حياة(ن) دوبها دوب بسكات
لا نخوة(ن) تذكر ولا من حميا

ياليت ياليت المنايا ليا جات
في مثل هذا لا بلى الله تهيا

ما تأخذ الطيب زبون المهمات
اللي ليا جاء واجبه ما تفيا

لا كدر الخاطر ولا هوب شمات
ولاشاف ربعه جوا مسايير حيا

ان غاب قلنا من غيابه سلامات
وليا حضر فيه الثقه والكفيا

هيهات يا فرق المخاليق هيهات
سوات ما بين الثرا والثريا