تشرين

من بعد كنّا في هنانا سلاطين
بنّا .. وفقر وصالهم مبتلينا

الجرح أقسى جرح جانا من البين
نبغي لقاهم واللقا مايبينا

والصاحب اللي منزله داخل العين
من كلّفه يبني للأحزان مينا ؟!

من علّمه يقطع شعاع العناوين ؟
يوم انّ شمس وصالنا تحتوينا !!

واللي سمح له يبعد سنين وسنين
ما قال له : لا من تعبنا .. يجينا ؟

واتعبْتنا .. نقرا وجيه الملايين
ونْرد نشكي : ليتنا ماقرينا

نصبر وينبت من أملنا بساتين
ويموت فينا صبرنا ما التقينا

العام كنا في رجا الغيم سالين
واليوم جفّت أرضنا ماارتوينا

تكفين يافرقا المواليف تكفين
خفّي علينا توّنا مابرينا

ذكرى انكسار القلب بانصاف تشرين
حلّت .. ولكن .. وش بقى في يدينا !