ريح المطر

زرعتي بساتين الغلى وسط معلوقي
الين ازهرت حب وتعابير واشواقي

وشلتي خيوط الحسد من داخل الموقي
لما شفت عدواني حبيبين واصداقي

وجاء ذوقك المرهف على منتهى ذوقي
متى يجتمع بالكون حلوٍ وذواقي

وعطيتيني الوقت الذي كنت مسروقي
لما صرتي احساسي واناسي وترياقي

وشلتي هموم معلقاتٍ على طوقي
لما اصبحت حرِّ مثل مطلوق الاسباقي

رتقتي بعطفك خافقٍ كان مفتوقي
بليا ألم سرتي إلى داخل اعماقي

وسرى حبك الدافي كما الدم بعروقي
عسى ما يجي يومٍ تحسين بفراقي

وهبتيني اضعاف على كامل حقوقي
وش اجزيك يا حلم سكنتي بخفّاقي

احبك بروحي وانتي الروح والشوقي
أو اهديك قلبي وانتي المالك الباقي

ملكتي بدوىٍ خايلك غيم وبروقي
على اول حلول الوسم والبدو تشتاقي

لريح المطر يا مزنة همللت فوقي
فديتك بكل اللي ملكته من نياقي

اغني لك الحاني على كل طاروقي
واكحّل عيون الشعر في حبك الراقي

شعر: احمد الجريفاني
الحان و غناء: عبدالله الصريخ