عشرين عام

طلبت عين الشمس عودٍ من الضي
في حلكة الظلماء يولِّع سراجي

قالت لي ابشر ثم غابت عن الحي
وانا لعين الشمس مازلت راجي

لا مر عامٍ قلت ابنتظره شوي
ياعل صبري ينتهي بانفراجي

عشرين عام انطر ولا شفت انا شي
غير الظلام وحيرتي واحتياجي

عشرين عام ومهجتي جرحها نيء
اكابد الحسرات شربي هماجي

الناس قالت وشلك بطرد مقفي
ماطعتهم و اليوم صعبٍ خراجي

حكَّمت قلبي واثري القلب مخطي
الفوت فات ولا يفيد احتجاجي

حفرت قبري ياهل العرف بيدي
يوم اتبع المقفي لموتٍ مفاجي

رحت ابي اعالج قالوا الجرح مبطي
العالم الله كآنك انسان ناجي

وبدأ يبيع الياس فيني ويشري
وضاقت يعيني واسعات الفجاجي

وجيت ابي اقوم وعيّت الرجل تمشي
كني سجينٍ حال دونه سياجي

وامسى نديمي كسرة سراج مطفي
لاليلي انصفني ولا الصبح باجي

عزاه من خلٍ ذبحني واناحي
سكناي الأرض وهو سكن برج عاجي

حسيبك الله كآنك اسرفت بالغي
كيف العزيز يصير برضاك لاجي

ياما دعيتك ريم وخشيف وظبي
ولا هقيت انك تعكّر مزآجي

تركتني في قاعة البير مرمي
ولعبت بي لعب الطفل بالعياجي

آخر علاج العله الخافيه كي
كويتني واخفيت عني علاجي

كلمات الشاعر احمد الجريفاني
اسم الشيله : عشرين عام

اداء المنشد : دايود الخلف