الدنيا - حمد هادي المسردي

قامت الدنيا تحداني تحدي
غير أنا با قوم أعاندها عنادي

وأتحداها ولو ما هي بقدي
فان مصير الكون والكل النفادي

أزمة ٍ تقبل وأزماتٍ تعدي
وكل شي ٍ بيد خلاق العبادي

إنما الدنيا متاع ٍ والمردي
بالثرى والقبر مكفوف اللحادي

كل ما قام الزمان يجور ضدي
من نشدني كيف حالك قلت زادي

آتظاهر للتحدي بالتصدي
لاجل ما تكثر شماتات الاعادي

فإن ما قد كتب لي ما منه بدي
والمصير يصير والواقع وكادي

لو حاولت بكل جهد وكل جدي
ماعن المقسوم رغم الاجتهادي

لازم ارضا به ولو ما هوب ودي
ذلك امر اللي عليه الاعتمادي

لو شكيت ولو بكيت وباح سدي
ما سوى الخالق يحقق لي مرادي

وان مدحت الحظ وان قلت متردي
كل من لافاده الله ما استفادي

بأجتهد وآكد واستمتع بكدي
والله يكتب كل مافيه السدادي

لازم أنسى أمس ٍ وأعمل لأجل غدي
وكذا الدنيا كفاح ٍ وجهادي

والاجل محتوم وقته لا يمدي
لن اموت إلا إذا حان الميعادي

دام لي حد ٍ مشيت الين حدي
والله القادر ويفعل ما ارادي

مهما عديت الليالي السود عدي
فالأجل ينقص وهي تبقى جدادي

كم وكم بقعا تجيب وكم تودي
والمنايا كل يوم تمد ايادي

ودي أسلك درب أبوي ودرب جدي
وأترك الأنذال وآماشي العوادي

يكفي اللي فات من جهل ٍ وصدي
عن طريق العدل جد ٍ واعتمادي

رفقة الطيب كما عود ٍ وندي
وزباد وعنبر ومسك ٍ وكادي

ورفقة الانذال لابد ان تودي
للندم مهما يطول بها التمادي

هكذا الدنيا بها استرخاً وشدي
ما تعاش الا بصبر ٍ واجتلادي

دام ما حد ٍ راح لي فيها بعدي
سوف أقاومها وبالله اعتقادي

والعدو ماني بطالب منه مدي
والصديق أغليه لو كان اقتصادي

© 2024 - موقع الشعر