مرثية الأمير نــــــــايف - ناجي الصقار

يا نفس نايف إرجعي عند باريه
ولا تعتذر يا موت وتقول نايف

نايف فعوله تنحسب من خَطاويه
عند النبي العدنان تلقاه ضايف

لو ينفدى منَّك بالأرواح نفديه
بعيالنا وعيالُهُم والولايف

في جنة الفردوس دَوّر تلاقيه
قله ترى شعبك وصاياك شايف

قله ترانا نحتذي في مباديه
ما بيننا مؤمن من الموت خايف

قله كلامك نتبعك في قوافيه
نخدم وطنا حب , ما هي وظايف

قله تراى بدموعنا اليوم نبكيه
يا للأسف ما بعدها من حسايف

في غيبته نعتاش من بيض اياديه
في سيرته نبدا حديث المضايف

وحنا خذينا من كلامه معانيه
نمشي على نهجه بليا نكايف

ما همنا بعض البشر لو تعاديه
رمز ل هَلَ السنة وصد النصايف

نفخر بتاريخه ويا عز ماضيه
حراير الأحرار وردن عفايف

لو يحتمل مقياس حُب البشر فيه
شيٍ يفوق الوصف فوق الوصايف

قله ترى كل الخلايق تعزيه
وراضي بحكم الله شعبك ورايف

نبكي بعد سُلطان ذكره ونحييه
وشلون ما نبكي بعد موت نايف

© 2024 - موقع الشعر